Hindiston talabalarini O‘zbekistondagi tibbiyot universitetlarida o‘qimaslikka chaqirmoqda
O‘zbekistondagi ta’lim muassasalari Hindistonning tibbiy ta’lim standartlariga javob bermasligi aytilmoqda.
Hindiston Milliy tibbiy komissiyasi (NMC) xorijda tibbiyot bo‘yicha tahsil olayotgan yoki o‘qishni rejalashtirayotgan abituriyentlarga ogohlantirish berdi. Komissiya Markaziy Amerikadagi uchta va O‘zbekistondagi bitta tibbiy oliygohda o‘qish tavsiya etilmasligini ma’lum qildi.
NMC bayonotida aytilishicha, bu ta’lim muassasalari Hindistonning tibbiy ta’lim standartlariga javob bermaydi. Xususan, Toshkent davlat tibbiyot universitetining Chirchiq filialida tahsil olishdan ogohlantirildi. Qolganlari Belizdagi Markaziy Amerika sog‘liqni saqlash va fanlar universiteti, Kolumbiya Markaziy universiteti hamda Vashington sog‘liqni saqlash va fanlar universiteti bo‘ldi.
Komissiya bu universitetlarda kerakli akademik va klinik standartlar mavjud emasligini, zarur infratuzilma yo‘qligini, haddan tashqari kontrakt to‘lovlari olinayotganini, ta’lim sifati va sharoitiga doir yolg‘on ma’lumotlar tarqatilayotganini ta’kidladi. Ba’zi talabalar o‘qishni tark etmoqchi bo‘lganida ularga bosim o‘tkazilgani ham aytilgan.
NMC xorijdagi barcha hind talabalarini FMGL (Foreign Medical Graduate Licentiate) qoidalariga qat’iy rioya qilishga chaqirdi. Bu qoidalar o‘qish davomiyligi, o‘quv dasturi, ta’lim tili, klinik tayyorgarlik va amaliyot kabi jihatlarni o‘z ichiga oladi. Mazkur talablar bajarilmasa, Hindistonda tibbiyot sohasida ishlash uchun ro‘yxatdan o‘tish imkonsiz bo‘lishi mumkin.
