Isroilda Netanyaxuga suiqasd uyushtirgan keksa ayol hibsga olindi
Muxolifat rahbari Lapid voqeani keskin qoralab, bunday harakatlar qat’iy jazolanishi kerakligini ta’kidladi.
Isroil xavfsizlik xizmatlari Bosh vazir Benyamin Netanyaxuga suiqasd uyushtirishni rejalashtirganlikda gumon qilingan ayolni qo‘lga oldi. Bu haqda “Kan” axborot agentligi xabar berdi.
Ma’lumotlarga ko‘ra, 70 yoshlar atrofidagi ayol Netanyaxuga nisbatan tajovuzkor harakatlar tayyorlaganlikda ayblanmoqda. U Isroil markazidagi norozilik namoyishlari faollaridan biri bo‘lib, qarindoshlari bilan bo‘lgan suhbatda Bosh vazirga tankga qarshi granata bilan hujum uyushtirish niyatini ochiq bayon qilgan.
Ma'lum qilinishicha, ayol qurol topish uchun boshqa faollar bilan aloqa qilgan, Netanyaxuning xavfsizlik tizimi haqida ma’lumot yig‘ishga harakat qilgan. Ushbu harakatlardan xabardor bo‘lgan huquq-tartibot idoralari uni “Shin Bet” — Isroil xavfsizlik xizmati yordamida hibsga olgan.
Gumonlanuvchi Og‘ir va xalqaro jinoyatlarni tergov qilish milliy boshqarmasiga topshirilgan va so‘roq davomida aybini qisman tan olgan. Sud uning yoshi, sog‘ligi va ijtimoiy holatini inobatga olgan holda ayolni ehtiyot chorasi bilan qo‘yib yuborishga qaror qildi. Unga nisbatan Bosh vazir va davlat muassasalariga yaqinlashish taqiqi joriy etilgan.
Tergov tafsilotlarini yoritishga oid sud tomonidan ilgari e’lon qilingan cheklovlar esa bekor qilindi.
Mazkur holat yuzasidan muxolifat yetakchisi Yair Lapid bayonot berib, voqeani keskin qoraladi:
“Bosh vazirga suiqasd uyushtirish har qanday holatda ham og‘ir jinoyatdir. Bunday niyat egalari muqarrar jazoga tortilishi kerak”, — dedi u.
