Kiyevda minglab odamlar Zelenskiyga qarshi namoyishga chiqdi
Prezidentning korrupsiyaga qarshi organlar ustidan nazoratni kuchaytiruvchi qonuni fuqarolar va Yevropa davlatlarining e’tiroziga sabab bo‘ldi.
Ukrainada Prezident Vladimir Zelenskiy tomonidan qabul qilingan yangi qonun fuqarolar noroziligiga sabab bo‘ldi. Qonunga muvofiq, mamlakatdagi asosiy korrupsiyaga qarshi idoralar — Milliy korrupsiyaga qarshi byuro (NABU) va Maxsus korrupsiyaga qarshi prokuratura (SAPO) — endilikda prezident tayinlaydigan bosh prokuror nazoratiga o‘tkaziladi. Bu esa ularning mustaqilligini yo‘qqa chiqarishi mumkin, deya ogohlantirmoqda tanqidchilar.
22 iyul kuni kechqurun Kievda minglab odamlar norozilik namoyishiga chiqdi. Shuningdek, Lviv, Dnipro va Odessa kabi boshqa yirik shaharlarda ham norozilik aksiyalari kuzatildi. Namoyishchilar “Qo‘llaringni NABUdan ol”, “Biz Evropani tanladik, avtokratiyani emas” kabi shiorlarni ko‘tarib chiqishdi.
Zelenskiy bu islohotlarni “Rossiyaning ichki ishlarimizga ta’sirini yo‘q qilish” zarurati bilan izohlagan. Uning aytishicha, yangi tizim korrupsiyaga qarshi kurashni yanada samaraliroq qiladi. Biroq, fuqarolik jamiyati faollari va xalqaro kuzatuvchilar bu qarorni korrupsiyaga qarshi kurashning orqaga ketishi sifatida baholamoqda.
Ukrainaning Yevropadagi ittifoqchilari — jumladan, Germaniya, Fransiya va Shvetsiya — yangi qonunni tanqid ostiga oldi. Ularning fikricha, Zelenskiyning bu qadami Ukraina tomonidan Yevropa Ittifoqiga qo‘shilish yo‘lida erishilgan korrupsiyaga qarshi islohotlarni xavf ostiga qo‘yadi.
Yevropa Komissiyasining kengayish bo‘yicha komissari Marta Kos ushbu qonunni “qayta orqaga yurish” deb atadi va bu islohotlar Yevropa Ittifoqi bilan muzokaralarni to‘xtatib qo‘yishi mumkinligini bildirdi.
Jamoatchilik bosimi ostida Zelenskiy ikki hafta ichida NABU va SAPO mustaqilligini kafolatlaydigan yangi qonun loyihasi ishlab chiqilishini va’da qildi. Hozircha bu bayonot namoyishchilarni tinchlantirmagan.
Zelenskiyning korrupsiyaga qarshi organlar ustidan nazoratni kuchaytirish qarori Ukrainada fuqarolik jamiyati va xalqaro hamjamiyat tomonidan keskin tanqidga uchramoqda. Bu voqealar mamlakatning demokratik rivojlanishi, Yevropa Ittifoqi bilan integratsiyasi va xalqaro ishonchini jiddiy sinovdan o‘tkazmoqda.
