Yevropa Ittifoqi AQShga nisbatan 90 mlrd yevrolik boj choralarini e’lon qilishga tayyor
Muzokaralar 1-avgustga qadar ijobiy natija bermasa, tariflar 7-avgustda kuchga kirishi mumkin.
Yevropa Ittifoqi Qo‘shma Shtatlar bilan savdo masalasida kelishuvga erishilmasa, AQSh eksportiga 90 milliard yevrodan ortiq bojxona to‘lovlari joriy etishni rejalashtirmoqda. Bu haqda Oxu.az nashri Yevropa diplomatik doiralariga tayanib xabar bermoqda.
Ma’lum qilinishicha, 7-avgustgacha tomonlar o‘rtasida savdo kelishuvi imzolanmasa, Yevropa Ittifoqi tomonidan javob chorasi sifatida AQShdan olib kiriladigan ayrim mahsulotlarga 30 foizgacha bo‘lgan boj to‘lovlari qo‘llanishi kutilmoqda. Ushbu choralarga avtomobillar, avto ehtiyot qismlar, fuqarolik aviatsiyasi vositalari hamda boshqa sanoat mahsulotlari kiradi.
Avvalroq, iyul oyi o‘rtalarida AQSh prezidenti Donald Tramp 1-avgustdan boshlab Yevropa Ittifoqidan import qilinadigan deyarli barcha tovarlarga 30 foiz, po‘lat va alyuminiy mahsulotlariga esa 50 foizlik bojlar joriy etilishini e’lon qilgan edi.
Yevropa Ittifoqi favqulodda holatga tayyorgarlik doirasida savdo muzokaralarini tezlashtirgan. YeI savdo komissari Marosh Shefchovich bu borada AQSh Savdo vaziri Govard Lutnik bilan to‘g‘ridan-to‘g‘ri muloqot olib bormoqda. Bryussel tomonidan 1-avgust muzokaralar uchun “oxirgi muddat” sifatida belgilanayotgan bo‘lsa-da, qarshi bojlar 7-avgustda kuchga kirishi mumkin.
Yevropa tomoni savdo urushi kuchayishi Yevropa iqtisodiy xavfsizligiga tahdid solishini ma’lum qilgan va AQShning har qanday bir tomonlama iqtisodiy choralariga qat’iy javob qaytarilishini bildirgan.
