Har yili 20 ming kishiga miyaga chipi o‘rnatiladi
Ilon Mask asos solgan kompaniya neyrotexnologiyalar orqali milliardlab daromad olishni ko‘zlamoqda.
Ilon Mask tomonidan tashkil etilgan Neuralink kompaniyasi 2031-yilgacha har yili 20 ming kishiga miya chipi implantatsiya qilishni rejalashtirmoqda. Bloomberg manbasiga ko‘ra, kompaniya olti yil ichida beshta yirik klinika ochadi va kamida uch turdagi neyroimplantni ishga tushiradi.
Ushbu chiplar turli sog‘liq muammolarini hal etishga xizmat qiladi. Telepathy deb nomlangan birinchi qurilma foydalanuvchiga kompyuter bilan to‘g‘ridan-to‘g‘ri fikr orqali muloqot qilish imkonini beradi. Blindsight nomli ikkinchi model ko‘rish qobiliyatini tiklashga yordam beradi, uchinchi — Deep deb ataluvchi qurilma esa Parkinson kasalligi va tremorni davolash uchun mo‘ljallangan.
Neuralink 2024-yilda klinik sinovlarni boshlagan va hozirgacha kamida 10 bemorda chip implantatsiyasi muvaffaqiyatli amalga oshirilgan. Shuningdek, AQSh FDA agentligi kompaniyaga Breakthrough Device (ilgarilovchi qurilma) maqomini bergan, bu esa nutq qobiliyatida og‘ir nuqsoni bor bemorlar uchun aloqa imkoniyatini yaxshilashga qaratilgan.
Neuralink 2031-yilgacha har yili chip operatsiyalari orqali 1 milliard dollarlik daromad olishni mo‘ljallamoqda. Biroq mutaxassislar Maskning oldingi loyihalarida bo‘lgani kabi bu safar ham va’dalar orqaga surilishi mumkinligini ta’kidlamoqda. Kompaniya hozirgacha $1,3 milliard sarmoya jalb qilgan va bozordagi umumiy bahosi $9 milliardga baholanmoqda.
