Italiya aeroportlarida ommamiy ish tashlash boshlandi
Minglab yo'lovchilarning parvozlari kechikishi yoki bekor qilinishi mumkin.
Italiya aeroportlarida 26-iyul kuni to‘rt soatlik umumiy ish tashlash o‘tkazilishi rejalashtirilmoqda. Bu esa sayyohlik mavsumining eng yuqori cho‘qqisida o‘nlab reyslarning kechikishi va bekor qilinishiga olib kelishi mumkin.
Euronews xabariga ko‘ra, barcha yirik aeroportlarda mahalliy vaqt bilan soat 13:00 dan 17:00 gacha yuk tashuvchilar, yer xodimlari va boshqa aeroport xodimlari ish tashlashadi.
Namoyishchilar ish joylarida xavfsizlikni oshirish, mehnat sharoitlarini yaxshilash, kasbiy va shaxsiy hayot o‘rtasida muvozanatni ta’minlash kabi talablarni ilgari surmoqda. Shuningdek, ular ijtimoiy kafolatlarni saqlagan holda milliy mehnat shartnomalarini uzaytirishni so‘ramoqda.
Ish tashlash EasyJet, Ryanair, British Airways, Wizz Air, TUI, Volotea hamda Italiyadagi milliy aviakompaniya ITA Airways (sobiq Alitalia) kabi yirik aviakompaniyalarga zarar yetkazishi kutilmoqda.
Vaziyat boshqa Yevropa davlatlaridagi ish tashlashlar bilan yanada murakkablashmoqda. Ispaniya va Portugaliya aeroportlarida ham norozilik namoyishlari bo‘lib o‘tmoqda, bu esa yozgi sayohat mavsumida minglab sayyohlar uchun transport inqirozini keltirib chiqarishi mumkin.
Italiyadagi noroziliklar mamlakatning asosiy aeroportlarini qamrab oladi: Milan-Malpensa, Milan-Linate, Rim-Fiumichino, Florensiya, Neapol va Venetsiya. Ayniqsa, Milan-Linate aeroportida qiyin vaziyat kutilmoqda, chunki yo‘lovchilarni ro‘yxatdan o‘tkazish va darvoza xizmatlari uchun mas’ul Swissport xodimlari ham ish tashlashga qo‘shiladi.
Ispaniyada ish tashlash harakatiga Volotea aviakompaniyasi uchuvchilari va ekipaj a’zolari boshchilik qilmoqda. Bu kompaniya yo‘nalishlari Yevropaning 100 dan ortiq shaharlarini qamrab oladi, bu esa ko‘plab mashhur sayohat yo‘nalishlarida aviaqatnovlarni jiddiy ravishda buzishi mumkin.
Eng uzoq davom etadigan norozilik namoyishi Portugaliyada kutilmoqda. Bu yerda Groundforce (hozirgi Menzies Aviation) xodimlari 26-iyul soat 00:00 dan 29-iyul 00:00 gacha uch kunlik ish tashlashni e’lon qilgan. Ularning harakati Lissabon aeroporti ishini butunlay falaj qilishi mumkin. Bundan tashqari, avgust oyida ham ish tashlashlar qayta-qayta o‘tkazilishi rejalashtirilgan: 8–11, 15–18, 22–25 avgust hamda 29-avgust – 1-sentyabr kunlari.
