Kolumbiya universiteti Falastinni qo‘llagan talabalarni o‘qishdan chetlatdi
Namoyish paytida 78 kishi hibsga olindi, 4 talaba shifoxonaga yotqizildi.
AQShning nufuzli Kolumbiya universiteti Falastinni qo‘llab-quvvatlash maqsadida o‘tkazilgan norozilik namoyishlarida ishtirok etgan 80 ga yaqin talabaga nisbatan intizomiy chora ko‘rdi. Universitet rahbariyati tomonidan chiqarilgan qarorga ko‘ra, ayrim talabalarning o‘qishdan chetlatilishi bir yildan uch yilgacha davom etadi. Chetlatilganlar universitetga qaytishi uchun rasmiy kechirim xati topshirishi talab qilinmoqda.
Sanksiyalar asosan Butiler kutubxonasini egallab, Falastinlik yozuvchi Bazeel al-Arajga bag‘ishlangan tadbir o‘tkazgan talabalar guruhi a’zolariga nisbatan joriy etilgan. Namoyishchilarni tarqatish uchun universitet rahbariyati Nyu-York politsiyasini chaqirgan, natijada 78 kishi hibsga olingan, to‘rt nafar talaba bosh miya chayqalishi tashxisi bilan kasalxonaga yotqizilgan.
Talabalar harakati vakillari hisoblangan Columbia University Apartheid Divest (CUAD) tashkiloti bu holatni universitet tarixida bitta siyosiy norozilik harakati uchun qo‘llanilgan eng keng ko‘lamli jazo sifatida baholagan. Ularning iddaosiga ko‘ra, bunday keskin choralarga universitet va AQShdagi Tramp ma’muriyati o‘rtasida, ilgari to‘xtatilgan 400 million dollarlik federal mablag‘ni tiklash yuzasidan olib borilgan muzokaralar sabab bo‘lgan.
Barcha bosimlarga qaramay, talabalar Falastin masalasidagi faolliklarini davom ettirish niyatida ekanliklarini ma’lum qilgan.
