Putin va Zelenskiy yuzma-yuz uchrashadigan bo‘ldi
Istanbuldagi muzokarada bunga kelishib olindi.
Ukraina va Rossiya Zelenskiy hamda Putinning uchrashuvini o‘tkazish bo‘yicha kelishuvga erishdi. Bu haqida Turkiya tashqi ishlar vaziri Hoqon Fidan maʼlum qildi.
Uning so‘zlariga ko‘ra, bu kelishuv Istanbulda o‘tgan muzokaralarning uchinchi bosqichi doirasida muhokama qilingan.
“Ukraina va Rossiya yetakchilari sammitini Turkiyada o‘tkazish bo‘yicha kelishuvga erishildi. Bunda muzokaralar delegatsiyalarining roli katta. Mazkur masalani tobora puxtaroq muhokama qilishimiz davomida, uchrashuvga tayyorgarlik belgilari borligini ko‘ryapman”, — deya qo‘shimcha qildi Fidan.
Turkiya TIV rahbari, shuningdek, agar muzokaralar davom etsa, “oraliq kelishuvga erishish” mumkinligiga ishonch bildirdi.
Avvalroq Vladimir Zelenskiy ham Putin bilan to‘g‘ridan-to‘g‘ri uchrashuv haqida gapirib, muzokarada ushbu masala muhokama qilinganini aytgandi.
“Rossiya va Ukraina delegatsiyalari o‘rtasidagi so‘nggi muzokaralarda ikki davlat yetakchilarining to‘g‘ridan-to‘g‘ri uchrashuvi ehtimoli muhokama qilindi”, — degan u jurnalistlar bilan uchrashuvda.
