Turkiyada o‘g‘il onasini tayoq bilan urib o‘ldirdi
Jinoyatchining ilgari ham giyohvandlik bo‘yicha 11 marotaba huquqbuzarligi aniqlangan.
24-iyul kuni Turkiyaning Adana viloyati Yuregir tumanida joylashgan Selahattin Eyyubi mahallasida ayanchli voqea yuz berdi. Rasmiy ma’lumotlarga ko‘ra, 27 yoshli O‘g‘uz Chetin ismli shaxs onasi Teslime Chetin (63 yosh) bilan o‘zaro janjal oqibatida unga tan jarohati yetkazgan.
Dastlabki surishtiruvlarga ko‘ra, O‘g‘uz Chetin onasidan pul talab qilgan, biroq rad javobi olganidan so‘ng, u bilan og‘zaki tortishuvga kirishgan. Mojaro jismoniy to‘qnashuvga aylanishi natijasida u onasini tayoq bilan urgan. Olingan og‘ir tan jarohatlari oqibatida Teslime Chetin voqea joyida vafot etgan.
Voqeadan so‘ng gumonlanuvchi favqulodda xizmatlarga qo‘ng‘iroq qilib, “onam hushini yo‘qotdi” deya yolg‘on ma’lumot bergan. Tez tibbiy yordam guruhi yetib kelganida ayolning hayotini saqlab qolib bo‘lmaganligi aniqlangan.
Aniqlanishicha, O‘g‘uz Chetin ilgari “giyohvand moddalardan foydalanish” bilan bog‘liq 11 ta jinoyat ishi yuzasidan ro‘yxatda turgan. Voqea yuzasidan Adana viloyati politsiyasi huzuridagi Qotillik bo‘limi tomonidan tergov harakatlari olib borildi. O‘g‘uz Chetin qo‘lga olinib, protsessual tartibda sudga olib chiqildi va chiqarilgan sud hukmiga ko‘ra hibsga olingan.
