Turkiyada o'rmon yong‘inlari kuchaymoqda: ikki viloyat tabiiy ofat zonasi deb e’lon qilindi
120 ta tuman aholisi evakuatsiya qilindi, 12 ming qutqaruvchi safarbar etilgan.
Turkiyaning O‘rtayer dengizi sohillarida joylashgan hududlarda yangi o‘rmon yong‘inlari yuzaga kelgani ortidan mamlakat hukumati Izmir va Bilejik viloyatlarini tabiiy ofat zonasi deb e’lon qildi. Bu haqda Turkiya Ichki ishlar vaziri Ali Yerlikaya rasmiy bayonot bergan.
Yong‘inlar Oqsuv shahri markazi va unga tutash hududlarda keng miqyosda tarqalgan. Aholi xavfsizligini ta’minlash maqsadida ko‘plab uylar bo‘shatilib, fuqarolar evakuatsiya qilingan. Kuchli shamol natijasida alangalar qirg‘oqbo‘yi hududlariga ham tarqalib, asosiy avtomobil yo‘llari vaqtincha yopilgan.
Manavgat shahrida ham uylar va infratuzilma xavf ostida qolgan. Yong‘inlarni bartaraf etish ishlariga o‘t o‘chiruvchilar bilan bir qatorda, mahalliy aholi, politsiya suv purkagichlari, shahar kommunal xizmatlari, shuningdek, vertolyotlar va samolyotlar jalb etilgan. Yong‘inga qarshi harakatlar havo va quruqlikdan muvofiqlashtirilgan tarzda olib borilmoqda.
Vazir Yerlikayaning ta’kidlashicha, 27-iyundan 24-iyulga qadar mamlakat bo‘ylab 120 ta tuman yong‘in xavfi sabab evakuatsiya qilingan. Bu davr mobaynida 12 mingdan ortiq qutqaruvchi o‘rmon yong‘inlariga qarshi kurashgan.
Bir oy davom etgan yong‘inlar oqibatida 311 ta uy butunlay vayron bo‘lgan yoki jiddiy zarar ko‘rgan. Uysiz qolgan fuqarolar uchun g‘arbiy viloyatlarda 85 ta vaqtinchalik boshpana tashkil etilgan.
Ichki ishlar vazirligi tabiiy ofat zonasida yong‘inlar to‘liq bartaraf etilgunga qadar favqulodda holatga yaqin darajada xavfsizlik choralarini kuchaytirganini bildirgan.
