Afrikaliklar xayriya ishlariga yevropaliklarga qaraganda 2,5 baravar ko'proq saxiylik qiladilar
Yaponiya esa eng ziqna davlat sifatida qayd etildi.
Britaniyaning "Charities Aid Foundation" tashkiloti tomonidan tayyorlangan 2024-yilgi “Jahon xayriya hisoboti”ga ko‘ra, afrikaliklar saxovat bobida boshqa mintaqalardan sezilarli darajada ilgarilab ketgan.
Hisobot 101 ta davlatda 50 mingdan ortiq respondentlar o‘rtasida o‘tkazilgan so‘rov natijalariga asoslangan. Ma’lum qilinishicha, jahon bo‘yicha odamlarning o‘rtacha 64 foizi xayriya ishlariga hissa qo‘shadi. Ushbu ko‘rsatkich Afrikada 72 foiz, Osiyoda 69 foiz, Yevropada esa 59 foizni tashkil qilgan. Shimoliy Amerikada esa bu ko‘rsatkich 56 foiz atrofida.
Xayriyaga sarflanadigan daromad ulushi bo‘yicha ham Afrika yetakchilik qilmoqda. Mintaqa aholisi o‘rtacha daromadlarining 1,54 foizini xayriya ishlariga ajratadi. Bu Yevropa ko‘rsatkichidan qariyb 2,5 baravar yuqori — Yevropada bu raqam atigi 0,64 foizni tashkil qilgan. Germaniyada esa eng past natijalardan biri qayd etilgan — bor-yo‘g‘i 0,39 foiz.
Eng saxovatli davlat sifatida Nigeriya ajralib turibdi: mamlakat aholisi o‘rtacha daromadining 2,83 foizini xayriya, diniy xarajatlar yoki bevosita yordam uchun sarflaydi. Eng past ko‘rsatkich Yaponiya hissasiga to‘g‘ri keldi — atigi 0,16 foiz.
Mazkur hisobot xalqaro donorlik madaniyatini tahlil qilishda muhim manba sifatida e’tirof etilmoqda.
