AQShda IT mutaxassisi to'g'ridan-to'g'ri qamoqxonadan yollangan

AQShda giyohvand moddalar savdosi uchun 11 yillik qamoq jazosini o‘tayotgan Preston Torp ismli mahkum dasturchilik sohasidagi yuqori salohiyati tufayli venchur startapga ishga qabul qilindi.

 

Torp dastlab Turso kompaniyasi tomonidan boshqarilayotgan ochiq manbali loyihalarda masofadan turib olti oy davomida ishlagan. Uning ish sifati startap asoschisi va bosh direktori Kosta Glauber e’tiborini tortdi. Glauber Torpga to‘liq stavkali ish taklif qilganidan so‘nggina uning hanuz jazoni o‘tayotgan mahkum ekanligini aniqlagan.

 

Bu Preston Torp faoliyat yuritgan ilk texnologik loyiha emas. U bundan oldin Unlocked Labs bilan hamkorlik qilgan va Meyn shtatidagi “Meyn pilot dasturi” orqali qamoqxonalarda ta’lim va masofaviy ish imkonini yaratishga hissa qo‘shgan.

 

Dasturchi sifatidagi yo‘lini u aynan qamoqda boshlab, dasturlashni o‘rganishga kirishgan. Pandemiyadan keyin Mauntin-Vyu qamoqxonasiga ko‘chirilgan Torp onlayn kollejda o‘qishni boshlagan. Uning so‘zlariga ko‘ra, o‘zgargan muhit unga yangi yo‘l ochgan va “hammasi tugagan emasligini” anglatgan.

 

Meyn shtatidagi jazoni o‘tayotgan ijobiy xulqli mahkumlar “Ishlab topilgan mehnat birligi” deb nomlangan sektorda yashab, ishlab, ma’lum daromad oladi. Ular ish haqining 10 foizini davlatga to‘lab, qolgan qismi orqali sud xarajatlari va qarzlarini qoplash imkoniga ega.

 

Rasmiy ma’lumotlarga ko‘ra, Meyn Qo‘shma Shtatlardagi eng past takroriy jinoyatchilik ko‘rsatkichiga ega shtatlardan biridir. Jumladan, kollej tahsilini olgan mahkumlar orasida jinoyatga qaytish darajasi deyarli nolga teng ekani qayd etilgan.