“O‘yinchoq shifokorlari” — Xitoyda Labubu modasi yangi kasb yaratdi
O‘yinchoqlar kundalik modaga aylangani bois shikastlanish holatlari ko‘paymoqda.
Xitoyda ommalashgan “Labubu” o‘yinchoqlarga bo‘lgan talab ortib borayotgani ushbu mahsulotlarni ta’mirlash bilan shug‘ullanuvchi maxsus mutaxassislar — “o‘yinchoq shifokorlari” kasbining shakllanishiga olib keldi. Bu haqda South China Morning Post nashri xabar bermoqda.
Mazkur xizmat turi Labubu o‘yinchoqlari shikastlanganda yoki ifloslanganda ularni ta’mirlash va tozalashni o‘z ichiga oladi. Aksariyat hollarda ushbu o‘yinchoqlarni moda ixlosmandlari kundalik aksessuar sifatida sumkalarida olib yurishadi, bu esa ularning tez-tez shikastlanishiga sabab bo‘lmoqda.
Ma’lumotlarga ko‘ra, ta’mirlash ishlari o‘yinchoq narxining o‘rtacha 10 foizini tashkil qiladi. Oddiy Labubu o‘yinchog‘i Xitoyda 99 yuan (taxminan 14 AQSh dollari) atrofida baholanmoqda.
Mazkur xizmat bozori ayniqsa yirik shaharlar, jumladan Pekin va Shanxayda tez sur’atlarda rivojlanmoqda. Ta’mirlovchilarning ayrimlari ijtimoiy tarmoqlarda o‘z xizmatlarini reklama qilib, mijozlar sonini oshirishmoqda.
