Eron Tehronni vaqtincha yopishga tayyorlanmoqda - suv tanqisligi yirik inqirozga aylandi
Hukumat noan’anaviy choralarni, jumladan ish haftasini qisqartirish va masofaviy ishlashga o‘tishni taklif qilmoqda.
Eron hukumati mamlakatda yuzaga kelgan jiddiy suv tanqisligi sababli poytaxt Tehronni bir haftaga yopish masalasini ko‘rib chiqmoqda. Rasmiylarning ta’kidlashicha, suv resurslarining keskin kamayishi oqibatida davlat muassasalari, ta’lim maskanlari va boshqa tashkilotlar vaqtincha faoliyatini to‘xtatishi mumkin.
Hukumat matbuot kotibi Fotima Mohajironiy ushbu vaziyatni “milliy muammo” deb atab, u insonparvarlik va iqtisodiy inqirozga olib kelishi mumkinligini ma’lum qildi. Unga ko‘ra, vaziyat shu darajada keskinki, poytaxtni boshqa shaharga ko‘chirish masalasi ham muhokama qilinmoqda.
Mahalliy nashrlarning xabar berishicha, hukumat suv va elektr energiyasini tejash maqsadida ish haftasini to‘rt kunga qisqartirish va imkon qadar masofaviy ishlash tizimini joriy etishni taklif qilmoqda.
Mutaxassislar ma’lumotiga ko‘ra, Eron suv havzalarining 80 foizdan ortig‘i qurib ketgan yoki deyarli qurib bo‘lgan. Poytaxt Tehronni suv bilan ta’minlab kelgan Jajrud daryosi mart oyidayoq deyarli to‘liq qurib qolgan. Yaqin ikki oy ichida barqaror suv ta’minoti tiklanishi kutilmayapti.
O‘tgan haftada Tehron va yana 50 dan ortiq shaharda suv ta’minoti cheklab qo‘yildi. Aholi soatlab, ba’zida esa kunlab suvdan uzilgan holatda qolmoqda. Bu esa ko‘plab fuqarolarning shimoldagi Kaspiy dengizi yaqinidagi hududlarga ko‘chib o‘tishiga sabab bo‘lgan.
Prezident Mas’ud Pezeshkianning poytaxtni boshqa shaharga ko‘chirish ehtimolini istisno etmagan bayonoti vaziyatning naqadar og‘irligini ko‘rsatmoqda. Mutaxassislar inqirozni uzoq yillar davomida ekologik muammolarga e’tibor qaratilmagani va resurslar infratuzilma o‘rniga boshqa siyosiy yo‘nalishlarga yo‘naltirilgani bilan izohlamoqda.
