Pekin suv ostida qoldi
Yomg‘ir va ko‘chkilar natijasida 30 kishi halok bo‘ldi, yuzlab aholi evakuatsiya qilinmoqda.
Pekin va unga tutash hududlarda yog‘gan kuchli yomg‘irlar va suv toshqinlari natijasida kamida 30 kishi halok bo‘ldi. Rasmiy ma’lumotlarga ko‘ra, faqatgina Miyun tumanida 28, Yanchinda 2 nafar fuqaro hayotdan ko‘z yumgan. Xebey provinsiyasida esa ko‘chkilar sabab 4 kishi vafot etgan, 8 nafari bedarak yo‘qolgan.
Tabiiy ofat ortidan 80 mingdan ortiq aholi xavfsiz hududlarga evakuatsiya qilindi. 28-iyul kuni Pekinda yog‘ingarchilik 543 millimetrgacha yetib, rekord darajaga chiqdi. 136 ta qishloq elektr ta’minotisiz qolgan. Pekin rahbariyati eng yuqori darajadagi ogohlantirishni e’lon qildi va odamlarni uydan chiqmaslikka chaqirdi.
Xitoy rahbari Si Szinpin barcha qutqaruv kuchlarini safarbar qilishni buyurdi, Bosh vazir Li Syan esa Miyun tumanidagi talafotlarni jiddiy deb baholadi. Tayshitun shaharchasida suv ko‘chalarni to‘ldirib yuborgan, elektr ustunlari ag‘darilgan. “Hammasi bir zumda sodir bo‘ldi”, — dedi voqeaga guvoh bo‘lgan do‘kon egasi.
Mutaxassislar fikricha, kuchli yog‘ingarchilik va suv toshqinlarining ortib borishi global iqlim o‘zgarishining oqibati. Pekinda oxirgi yillarda bu kabi tabiiy ofatlar takroran yuz bermoqda. 2023-yildagi suv toshqinlarida ham katta zarar ko‘rilgan, minglab odam evakuatsiya qilingan edi.
