Rossiyada migrantlarga taksichilik qilish taqiqlandi
Yangi qarorga ko‘ra, chet elliklar patent asosida taksi xizmatlarida ishlay olmaydi.
Rossiyaning Sankt-Peterburg shahri rahbariyati patent asosida ishlayotgan muhojirlarga taksi xizmatlarida faoliyat yuritishni taqiqladi. Gubernator Aleksandr Beglov tomonidan imzolangan hujjatga ko‘ra, ushbu cheklov 2025-yil oxirigacha amal qiladi va 10 kundan keyin kuchga kiradi.
Qarorga muvofiq, ish beruvchilarga o‘z haydovchilar tarkibini qayta ko‘rib chiqish uchun uch oylik o‘tish davri berilgan. Bu vaqt ichida kompaniyalar muhojir haydovchilarni ishdan bo‘shatishi va ularning o‘rniga Rossiya fuqarolarini ishga qabul qilishi kerak bo‘ladi.
Rasmiylarga ko‘ra, mazkur chora taksi xizmatlari sifatini va xavfsizligini oshirish bilan birga, mahalliy aholiga qo‘shimcha ish o‘rinlari yaratadi. Biroq iyul oyida shahar parlamenti spikeri Aleksandr Belskiy bunday qarorlar “kollaps”ga olib kelishi mumkinligini ta’kidlagan edi.
Eslatib o‘tamiz, 2025-yil boshida Rossiyaning 49 mintaqasida, jumladan, anneksiya qilingan hududlarda muhojirlar faoliyatiga cheklovlar kiritilgan edi. Bu chora-tadbirlar 2024-yil mart oyida Crocus City Hall’dagi teraktdan keyin kuchaytirildi. O‘zbekiston va Tojikistondan kelgan ishchilar asosiy ta’sir ko‘rgan guruh bo‘lib qolmoqda.
