16 yoshgacha bo‘lganlarga YouTube akkaunti yaratish taqiqlandi
Qaror bolalarni internetdagi zararli kontentdan himoya qilish maqsadida qabul qilingan.
Avstraliya hukumati tomonidan qabul qilingan yangi qarorga muvofiq, 2025-yil 10-dekabrdan boshlab 16 yoshgacha bo‘lgan bolalar uchun YouTube akkaunti yaratish taqiqlanadi. Bu orqali mamlakat ijtimoiy tarmoqlarga kirish bo‘yicha yosh cheklovlarini kuchaytirgan dunyodagi ilk davlatlardan biri bo‘lmoqda.
Mazkur qaror mamlakat internet xavfsizligi regulyatori tomonidan ilgari surilgan tavsiyalar asosida qabul qilindi. Avvalroq ushbu taqiq faqat TikTok, Instagram, Facebook, X (sobiq Twitter) va Snapchat kabi platformalarga nisbatan amal qilgan edi.
Avstraliya bosh vaziri Entoni Albaneze bu tashabbusni quyidagicha izohladi: “Ijtimoiy tarmoqlarning salbiy ta’sirini bilamiz. Hukumatingiz yosh avstraliyaliklarni himoya qilish borasida qat’iy chora ko‘rishga bel bog‘lagan.”
Tadqiqotlarga ko‘ra, 10–15 yosh orasidagi bolalarning katta qismi aynan YouTube’dan faol foydalanmoqda. E-Xavfsizlik komissari Juli Inman Grant o‘tkazgan so‘rov natijalariga ko‘ra, bolalarning 37 foizi zararli kontentni aynan ushbu platformada ko‘rganini bildirgan.
YouTube esa o‘zining ijtimoiy tarmoq emasligini ta’kidlab, bu qarorga ehtiyotkorona yondashmoqda. Kompaniya bayonotida platforma “bepul va sifatli kontent kutubxonasi” ekani va ta’lim hamda sog‘liqni saqlash kabi ijtimoiy sohalarga foyda keltirishi qayd etilgan.
Shunga qaramay, yangi tartibga ko‘ra, 16 yoshgacha bo‘lgan foydalanuvchilar akkaunt ocholmaydi, biroq platformaga cheklangan tarzda kirishlari mumkin bo‘ladi.
