Terror tahdidi sababli Hindiston-Pokiston suv kelishuvi to‘xtatildi
“Sindx” operatsiyasi ortidan Dehli Pokistonga suv bitimi bo‘yicha qat’iy shart qo‘ydi.
Hindiston Tashqi ishlar vaziri Subramaniam Jayshankarning parlamentda bergan bayonotiga ko‘ra, mamlakat Pokiston Hind daryosi suvlariga oid kelishuvni tiklashini terrorizmga barham berilishi bilan bog‘lamoqda.
Jayshankar Hindiston parlamentining yuqori palatasida “Sindx” harbiy operatsiyasi yuzasidan bo‘lib o‘tgan muhokamalarda so‘zga chiqib, Hind daryosi bo‘yicha 1960-yilda imzolangan bitim “do‘stona niyatlar asosida tuzilganini”, ammo bu hujjatning ruhiga yillar davomida zarar yetkazilganini ta’kidladi.
Unga ko‘ra, Pokiston Hind daryosi, shuningdek uning irmoqlari Chenab va Jelum ustidan foydalanish huquqiga ega bo‘lgan. Ammo Hindiston 22-aprel kuni Jammu va Kashmirdagi terakt ortidan bitimni to‘xtatganini bildirgan. Rasmiy Nyu-Dehlining ma’lum qilishicha, 26 kishining hayotiga zomin bo‘lgan hujum ortida transchegaraviy terrorizm alomatlari aniqlangan.
Shundan so‘ng, 7-may kuni Hindiston armiyasi “Sindx” nomli harbiy operatsiyani boshladi va Pokiston hududidagi nishonlarga zarba berdi. Pokiston bunga javoban harbiy chora ko‘rdi. 10-mayda tomonlar o‘t ochishni to‘xtatish borasida kelishuvga erishgan, ammo Hindiston hali operatsiya tugamaganini bildirgan.
Jayshankar bayonotida shunday dedi: “Hind daryosi bo‘yicha kelishuv tiklanishi uchun Pokiston terrorizmni qo‘llab-quvvatlamasligini amalda isbotlashi kerak”.
