Pekinda toshqin oqibatida halok bo‘lganlar soni 44 nafarga yetdi
Hozirda 80 mingdan ortiq aholi evakuatsiya qilingan.
Xitoy poytaxti Pekinda yuz bergan kuchli yomg‘irlar va suv toshqinlari oqibatida vafot etganlar soni 44 nafarga yetgani ma’lum qilindi. Bu haqda mamlakat favqulodda vaziyatlar xizmatlariga tayanib, "Sinxua" agentligi xabar berdi.
Rasmiy ma’lumotlarga ko‘ra, halok bo‘lganlardan tashqari yana to‘qqiz nafar fuqaro bedarak yo‘qolgan deb hisoblanmoqda. Avvalroq 30 kishi vafot etgani va 80 mingdan ortiq aholi xavfsiz hududlarga ko‘chirib o‘tkazilgani ma’lum qilingan edi.
23—29-iyul kunlari Pekin shahri va uning atrofidagi bir nechta tumanlarda — xususan, Miyun, Xuayrou, Yansin va Pinggu tumanlarida — kuchli yog‘ingarchilik qayd etilgan. Ushbu tabiiy ofat mazkur hududlarga eng katta zarar yetkazdi.
Ayni vaqtda favqulodda xizmatlar tomonidan suv toshqini oqibatlarini bartaraf etish ishlari olib borilmoqda. Tabiiy ofat sababli yuzaga kelgan talafotlarni kamaytirish maqsadida Xitoy hukumati tomonidan 200 million yuan (taxminan 28 million AQSh dollari) miqdorida mablag‘ ajratildi.
