Qozog‘istonda o‘zbekistonlik fuqaro chegarani buzgani uchun hibsga olindi
U “Jetisu” chegara posti yaqinida Rossiyaga noqonuniy o‘tmoqchi bo‘lgan.
Joriy yilning iyul oyida O‘zbekiston Respublikasi fuqarosi Qozog‘iston va Rossiya o‘rtasidagi rasmiy nazorat-o‘tkazish punktlaridan tashqarida, Pavlodar viloyatining Uspenskiy tumanidagi “Jetisu” chegara posti hududida noqonuniy harakat qilganlikda gumonlanib qo‘lga olindi. Bu haqda inbusiness.kz viloyat sudi matbuot xizmatiga tayanib xabar bermoqda.
Rasmiy ma’lumotlarga ko‘ra, fuqaro chegara chizig‘idan 80 metr narida noqonuniy tarzda bo‘lib, Rossiyaga piyoda o‘tmoqchi bo‘lgan. Hibsga olingan paytda u aybiga to‘liq iqror bo‘lgan, holat esa bayonnoma va boshqa ma’muriy ish materiallari bilan tasdiqlangan.
Pavlodar viloyati ma’muriy sudi fuqaro T.ni Qozog‘iston Respublikasi Ma’muriy javobgarlik to‘g‘risidagi kodeksining 514-moddasi 1-qismi (“Chet elliklar va fuqaroligi bo‘lmagan shaxslarning Qozog‘iston Respublikasida bo‘lish qoidalarini buzishi”) bo‘yicha aybdor deb topdi. Sud qaroriga ko‘ra, unga 9 sutkalik hibs jazosi tayinlandi.
Mazkur ajrim hali qonuniy kuchga kirmagan bo‘lib, belgilangan tartibda apellyatsiya berilishi mumkin.
