Rossiya maktablarida migrant bolalarga pullik ta’lim joriy etilishi mumkin

Rossiya Liberal-demokratik partiyasi (LDPR) rahbari Leonid Slutskiy boshchiligidagi bir guruh deputatlar mamlakat Davlat Dumasiga xorijiy fuqarolar va fuqaroligi bo‘lmagan shaxslarning farzandlari uchun 10–11-sinflarda bepul ta’lim olish imkoniyatini bekor qilishni nazarda tutuvchi qonun loyihasini taqdim etmoqda. Bu haqda “TASS” axborot agentligi xabar berdi.

 

Taqdim etilgan qonun loyihasiga ko‘ra, “Rossiya Federatsiyasida ta’lim to‘g‘risida”gi qonunga tegishli o‘zgartirishlar kiritilishi nazarda tutilgan. Unga muvofiq, xorijlik o‘quvchilar yuqori sinflarda faqat pullik asosda o‘qishlari mumkin bo‘ladi. Bepul ta’lim faqat Rossiyaning xalqaro shartnomalari yoki federal qonunlarida belgilangan hollarda saqlab qolinadi.

 

Deputat Slutskiy ta’kidlaganidek, Rossiyada ayni paytda maktab o‘quvchilari uchun taxminan 900 mingta o‘rin yetishmayapti. Uning fikricha, ayniqsa yangi qurilgan hududlarda muhojir bolalarning ko‘pligi maktablar va o‘qituvchilarga bosimni kuchaytirgan, bu esa ta’lim sifati pasayishiga olib kelmoqda.

 

Qonun loyihasi tashabbuskorlariga ko‘ra, bu chora ta’lim infratuzilmasi yukini kamaytiradi hamda Rossiya byudjeti uchun qo‘shimcha yengillik yaratadi.