Turkiyada politsiyachi xotini va ikki farzandini otib o‘ldirdi
Fojiadan so'ng u o‘z joniga ham qasd qilgan.
Turkiyaning Denizli viloyatida joylashgan Merkezefendi tumanida og‘ir jinoyat sodir bo‘ldi. Cizre shahrida xizmat qilgan 35 yoshli politsiya xodimi Coshkun S. o‘zining yillik ta’tilida oilasi yoniga kelganida, rafiqasi va ikki farzandini otib o‘ldirib, so‘ng o‘z joniga qasd qildi.
Voqea Karaman mahallasidagi to‘rt qavatli uyda sodir bo‘lgan. Mahalla aholisi tongda eshitilgan o‘q ovozlaridan so‘ng huquq-tartibot organlariga murojaat qilgan. Voqea joyiga yetib borgan tergovchilarning dastlabki ma’lumotlariga ko‘ra, Coshkun S. uxlab yotgan rafiqasi Nazli hamda farzandlari — 7 yoshli o‘g‘li Yağiz va 2 yoshli qizi Duruga o‘q uzgan.
Hodisa ortidan tergov ishlari boshlangan bo‘lib, voqea sabablari hozircha aniqlashtirilmoqda. Politsiyachining ruhiy holati va xizmatdagi so‘nggi faoliyati yuzasidan ham alohida surishtiruv olib borilmoqda.
