Xitoyda 3 yoshli bola 18-qavatdan qulab, tirik qoldi
Daraxt mo‘jizaviy tarzda bolaning hayotini saqlab qolgan.
Xitoyning Xanchjou shahrida 3 yoshli bola ko‘p qavatli uy derazasidan 18-qavat balandlikdan qulab tushganiga qaramay, omon qoldi. Bu haqda South China Morning Post nashri xabar berdi.
Ma’lumotlarga ko‘ra, hodisa 15-iyul kuni yuz bergan. Ota-onasi bolani bir muddatga buvisi va bobosi qaramog‘iga qoldirib ketgan. Katta yoshli qarindoshlar bolaning uxlayotganini hisobga olib, qisqa muddatga do‘konga chiqqan. Shu vaqt ichida bola uyg‘onib, uydagi derazaga chiqishga urinadi va muvozanatni yo‘qotib, pastga qulab tushadi.
Bolani daraxt shoxlari tutib qolgan bo‘lib, bu yiqilish zarbasini yumshatgan. Guvohlar tomonidan darhol tez yordam chaqirilib, bola kasalxonaga yetkazilgan.
Shifokorlar bolaning chap qo‘li singani, umurtqasi cho‘zilgani va ayrim ichki a’zolari shikastlangani aniqlagan. Shunga qaramay, uning bosh sohasi butun qolgan va bola hushida bo‘lgan. Voqea tibbiyot mutaxassislari tomonidan “mo‘jiza” deb baholanmoqda.
