AQShda 80 yil avval ajralgan aka-singil bir-birlarini topishdi
Onalari ruhiy shifoxonaga yotqizilgach, otasi bolalarga qaray olmagani bois ular turli oilalarga berilgan.
Amerika Qo‘shma Shtatlarida hayotiy burilishlarga boy insoniy voqea ro‘y berdi: tug‘ilganidan ko‘p o‘tmay ajralib ketgan Marian Griffin (80 yosh) va Donald Xefke (81 yosh) oradan deyarli 80 yil o‘tib, bir-birlarini topishdi. Bu haqda gazeta.ru ABC News manbasiga tayanib xabar bermoqda.
Ular 1946-yilda, ya’ni bolalik chog‘laridayoq bir-biridan ajralib qolgan. Ruhiy kasallikka chalingan onasi shifoxonaga joylashtirilgan, otasi esa bolalarga yolg‘iz qaray olmagani sababli, Marian sakkiz oylik, Donald esa bir yoshga to‘lmagan vaqtda vasiylikka topshirilgan.
Donald 1963-ilda o‘z yaqinlarini izlashga harakat qilgan, ammo Marianning asrab oluvchi oilasi bu boradagi muloqotni rad etgan. Marian esa akasi borligini mutlaqo bilmagan.
Oradan yillar o‘tib, Donaldning qizi Denis Beyker tergovga kirishdi. U 20 yildan ortiq vaqtni hujjatlarni o‘rganish, DNK platformalari orqali izlanishlarga sarfladi. Nihoyat, Marianning o‘g‘li Ancestry platformasida DNK natijalarini joylashtirgach, ular orasida qarindoshlik aniqlanib, bog‘lanish imkoni tug‘ildi.
Hozircha ular hali shaxsan uchrashishmagan – biri Kaliforniyada, ikkinchisi Floridada yashaydi. Biroq ular bir-birlarini topganidan hayajonda va yaqinda uchrashishni rejalashtirishmoqda.
