Zilzila sabab Kamchatka 2 metrga siljidi
30 iyul yuz bergan yer silkinishi hududga sezilarli darajada taʼsir qilgan.
Kamchatka yarimorolining janubiy qismi 30 iyul kuni yuz bergan kuchli zilzila oqibatida janubi-sharqqa tomon 2 metrga siljidi. Bu haqida Rossiya Fanlar akademiyasi Yagona geofizika xizmati hududiy bo‘limi maʼlum qildi.
“Biz geodinamik kuzatuvlar natijalariga ko‘ra dastlabki hisob-kitobni amalga oshirdik. Maʼlum bo‘ldiki, biz janubi-sharqiy tomonga sezilarli darachada ko‘chganmiz”, - deydi muassasa xodimlari Telegram-kanalida.
Mutaxassislarning taʼkidlashicha, ikki metrli siljishni 2011 yilda Yaponiyaning Toxoku shahrida sodir bo‘lgan zilziladan keyingi gorizontal siljishlar bilan solishtirish mumkin.
Shu bilan birga, Petropavlovsk-Kamchatskiy shahri taxminan 50 santimetrga ko‘chgan.
Eslatib o‘tamiz, yarimorol hududida joriy yilning 20 iyul kuni 7,6 balli, 30 iyulda esa 8.8 balli yer silkinishlari qayd etilgan. Bu esa hududda sunamiga sabab bo‘ldi, to‘lqinlar balandligi 10-15 metrga yetgan.
