Lukashenko prezidentlikka qayta nomzodini qo‘ymasligini e’lon qildi
Shuningdek Belarus rahbari o‘g‘lini voris sifatida ko‘rsatish haqidagi mish-mishlarni rad etdi.
Belarus prezidenti Aleksandr Lukashenko Time jurnaliga bergan intervyusida o‘g‘li Nikolay Lukashenkoni o‘zining vorisi sifatida ko‘rsatish haqidagi mish-mishlarni rad etdi. Davlat rahbari bu masala bo‘yicha shaxsiy fikrini bildirar ekan, bunday gaplar uning o‘g‘lini ranjitishi mumkinligini ta’kidladi.
“Yo‘q, u mening vorisim emas. Siz buni so‘rashingizni bilardim. Yo‘q, yo‘q, yo‘q ”, — dedi Lukashenko.
Shuningdek, u kelajakda prezidentlikka o‘z nomzodini qayta qo‘yish rejalari yo‘qligini ma’lum qildi. Belarus rahbari mamlakatda siyosiy o‘zgarishlar bo‘lishi mumkinligini inkor etmay, ularni “inqilobiy emas, balki evolyutsion yo‘l bilan” amalga oshirishga chaqirdi.
2025-yil 27-yanvarda Aleksandr Lukashenko yettinchi marta Belarus prezidenti etib saylangan edi. U 1994-yildan buyon mamlakatni boshqarib kelmoqda. Navbatdagi prezidentlik saylovi 2030-yilda o‘tkazilishi rejalashtirilgan.
Lukashenkoning kenja o‘g‘li Nikolay hozirda Pekin universitetida va Belarus davlat universitetida bir vaqtning o‘zida tahsil olmoqda. U 2022-yilda maktabni oltin medal bilan tamomlagan bo‘lib, 2024-yilda Pekin universiteti rahbariyati uni sinfidagi eng yaxshi talaba sifatida ta’riflagan.
