Qozog‘iston hokimiyatida endi faqat bilim va malaka inobatga olinadi
Prezident To‘qayev “oila klanidan voz kechish” siyosatini davom ettirishini bildirdi.
Qozog‘iston prezidenti Qosim-Jo‘mart To‘qayev davlat xizmatida rahbarlik lavozimlariga tayinlashda bilim va professionallikka ustuvorlik berilishi lozimligini taʼkidladi. U “oila yoki klan tizimi” endilikda hokimiyatda o‘rin tutmasligi kerakligini aytdi.
To‘qayevning bu fikrlari mamlakatda olib borilayotgan “Yangi Qozog‘iston” islohotlari doirasida yangradi. 2022 yilgi konstitutsion o‘zgarishlar natijasida prezidentning qarindoshlari yuqori davlat lavozimlariga tayinlanishiga taqiq qo‘yildi, shuningdek, davlat rahbarining siyosiy partiyalarga aʼzoligi cheklab qo‘yildi.
Shuningdek, davlat xizmatiga kadrlarni tanlashda “meritokratiya” — yaʼni, malaka, yutuq va raqobat tamoyillari asosida saralash tartibi kuchaytirildi. Bu, hukumat taʼbiricha, “oila-korporativ manfaatlardan xoli, professional boshqaruv tizimini” shakllantirishga qaratilgan.
Rasmiy maʼlumotlarga ko‘ra, mazkur islohotlar Qozog‘iston siyosiy tizimida shaffoflik va adolatni kuchaytirish, shuningdek, fuqarolarning davlatga ishonchini oshirishga xizmat qilishi kutilmoqda.
