Rossiyada o‘zbekistonlik erkak terrorizmni moliyalashtirgani uchun 9 yilga qamaldi
Sudlanuvchi 350 ming rubl jarima to‘lash va qattiq tartibli koloniyada jazo o‘tashga hukm qilindi.
Rossiya Federatsiyasida O‘zbekiston Respublikasi fuqarosiga nisbatan terrorizmni moliyalashtirish aybi bo‘yicha sud hukmi chiqarildi. Novosibirsk ikkinchi Sharqiy okrug harbiy sudi qaroriga ko‘ra, 28 yoshli shaxs 9 yil muddatga ozodlikdan mahrum qilindi hamda 350 ming rubl miqdorida jarima to‘lashga majbur etildi.
Sud qaroriga muvofiq, jazoning dastlabki uch yili qamoqxonada, qolgan qismi esa qattiq tartibli koloniyada o‘taladi. Mahkama, shuningdek, aybdorni Rossiya hududidagi terrorchilar va ekstremistlar ro‘yxatiga kiritish haqida qaror qabul qildi.
Tergov ma’lumotlariga ko‘ra, sudlanuvchi Rossiyada taqiqlangan va terrorchi sifatida tan olingan xalqaro tashkilot faoliyatini moliyaviy jihatdan qo‘llab-quvvatlash maqsadida o‘z tanishining bank hisob raqamiga mablag‘ o‘tkazgan. Ushbu mablag‘ keyinchalik mazkur tashkilot a’zosiga yetkazilgan.
