Sankt-Peterburg yaqinida o‘zbekistonlik migrant pichoqlangan holda topildi
Jabrlanuvchining so‘zlariga ko‘ra, noma’lum shaxslar uni o‘g‘irlab, mashinada olib ketib, o‘rmonzorda pichoqlashgan.
Rossiyaning Sankt-Peterburg shahri atrofida joylashgan Lisiy Nos qishlog‘i hududidan pichoq bilan jarohatlangan O‘zbekiston fuqarosi topildi. Mahalliy huquq-tartibot organlari xabariga ko‘ra, voqea 15-avgust kuni ertalab Finlyandiya ko‘rfazi qirg‘og‘ida sodir bo‘lgan.
28 yoshli erkakning boshiga qop kiydirilgan bo‘lib, tanasida bir necha pichoq jarohatlari aniqlangan. Jabrlanuvchining so‘zlariga ko‘ra, u bir kun avval Sestroretsk shahrida noma’lum shaxslar tomonidan majburan mashinaga o‘tqazilgan, so‘ng kaltaklanib va pichoqlanib o‘rmonzor hududiga tashlab ketilgan.
Hozirda jabrlanuvchi tibbiy muassasaga joylashtirilgan. Huquqni muhofaza qilish organlari voqea bo‘yicha tergov-surishtiruv harakatlarini olib bormoqda.
