“Men sukut saqlashni istamaydigan xalqning ovozini olib chiqaman”
“Dunyo go‘zali” tanlovida ilk bor falastinlik model ishtirok etadigan bo‘ldi.
Joriy yilning 21 noyabr kuni Tailandning Pak Kret shahrida bo‘lib o‘tadigan “Dunyo go‘zali” tanlovida tarixda ilk bor falastinlik model Nadin Ayub ishtirok etadi.
Nadin Ayub 2022 yilda “Miss Falastin” tojini qo‘lga kiritgan va o‘sha yili “Miss Earth” tanlovida kuchli beshlikka kirgan va o‘z mamlakatining tanlovdagi birinchi vakiliga aylangan.
Nadin Ayub Falastinda davom etayotgan gumanitar inqiroz tufayli xalqaro musobaqalardagi ishtirokini qoldirganini aytdi.
“Tarixda ilk bor Falastinning bu tanlovda ishtirok etishi men uchun katta sharaf. G‘azo sektoridagi xalqim og‘ir kunlarni boshdan kechirayotgan bir vaqtda men sukut saqlashni istamaydigan xalqning ovozini olib chiqaman. Men dunyo ko‘rishi kerak bo‘lgan qudratga ega har bir falastinlik ayol va bola nomidan so‘zlayman”, deb yozdi model o‘z sahifasida.
Maʼlumot uchun, Nadine Ayub - malakali ovqatlanish mutaxassisi, shuningdek, adabiyot va psixologiya bo‘yicha ilmiy darajalarga ega. U ayollarni qo‘llab-quvvatlaydigan xayriya platformasi asoschisi.
Ayub, shuningdek, ayollarni raqamli media va barqaror tadbirkorlik ko‘nikmalariga o‘rgatuvchi Olive Green akademiyasiga asos solgan.
