Toshkentda noqonuniy diniy ta’lim faoliyati fosh etildi
Litsenziyasiz faoliyat yuritgan shaxs va bolalarni darslarga yuborgan ota-onalarga nisbatan ma’muriy choralar ko‘rildi.
Poytaxtning Yunusobod tumanida huquq-tartibot idoralari tomonidan litsenziyasiz diniy o‘quv mashg‘ulotlari tashkil etilgani aniqlanib, faoliyatiga chek qo‘yildi.
Bu haqda Toshkent shahar ichki ishlar bosh boshqarmasi xabar berdi.
Tekshiruv davomida 5 yoshdan 11 yoshgacha bo‘lgan 8 nafar bola ijaraga olingan xonadonda ta’lim olayotgani ma’lum bo‘ldi. Mashg‘ulotlarni Andijon viloyatida tug‘ilgan, 32 yoshli ayol tashkil qilgan. U diniy ta’lim berish uchun belgilangan tartibda ruxsatga ega emasligi, shuningdek, sanitariya-gigiyena talablariga rioya etmaganligi aniqlandi.
Ish materiallari sudga yuborildi. Tashkilotchi ayol Ma’muriy javobgarlik to‘g‘risidagi kodeksning 241-moddasi (“Diniy ta’limotlarni o‘qitish tartibini buzish”) bo‘yicha javobgarlikka tortildi. Farzandlarini mazkur mashg‘ulotlarga yuborgan ota-onalar esa 47-modda (“Bolalarni tarbiyalash va o‘qitish bo‘yicha majburiyatlarni bajarmaslik”) doirasida javobgarlikka tortildi.
Huquq-tartibot organlari farzandlarning xavfsizligi, sog‘lom tarbiyasi va ta’limi uchun eng avvalo ota-onalar mas’ul ekanini ta’kidladi.
