Xorijga ishga borishni reklama qilgan blogerlarga sud ishi ochildi
Ular litsenziyasiz bevosita “ADWORLD” ni reklama qilgan.
Raqobat qo‘mitasi tomonidan xorijga viza olish va ishga yuborish bilan shug‘ullanuvchi subyektlar faoliyati bo‘yicha o‘tkazilgan o‘rganishlar davomida qonun buzilishi holatlari aniqlandi.
Tekshiruv natijalariga ko‘ra, @iwash_tashkent sahifasini yurituvchi bloger O. Jo‘rayev hamda @abdurahmonmufid sahifasini yurituvchi bloger A. Abdurahmonovlar tomonidan “ADWORLD GROUP” MCHJ faoliyatiga oid xorijga ishga yuborish xizmatlari reklama qilingani ma’lum bo‘ldi. Reklamalarda mazkur kompaniya fuqarolarga faqat konsultatsiya emas, balki bevosita ishga yuborish xizmatlarini taklif qilayotgani ta’kidlangan.
Qonunchilikka ko‘ra, “Xususiy bandlik agentliklari to‘g‘risida”gi Qonunning 13-moddasiga binoan, O‘zbekiston hududidan tashqarida ishga joylashtirish xizmatlari faqat tegishli litsenziyaga ega bo‘lgan tashkilotlar tomonidan amalga oshirilishi mumkin. Litsenziyasiz bunday faoliyatni yuritish qat’iyan taqiqlanadi.
Shuningdek, “Reklama to‘g‘risida”gi Qonunning 16-moddasida ham litsenziya yoki majburiy sertifikatga ega bo‘lmagan mahsulot va xizmatlarni reklama qilish taqiqlangani belgilangan.
Ushbu qonun buzilishlari yuzasidan O. Jo‘rayev va A. Abdurahmonovlarga nisbatan ma’muriy bayonnomalar rasmiylashtirilib, sudga yuborildi.
