Daniyada kitob savdosi solig‘i bekor qilindi
Bu davlatga yiliga taxminan 44 million yevro zarar keltirsada, hukumat aholini ko‘proq kitob o‘qishga undamoqchi.
Daniya hukumati aholini ko‘proq kitob o‘qishga rag‘batlantirish uchun kitob savdosidan 25 foizlik soliqni bekor qilishini e’lon qildi. Bu qadam kitobxonlikni oshirish va madaniy rivojlanishni qo‘llab-quvvatlash maqsadida qabul qilindi. Bu haqda The Guardian nashri xabar qildi.
Yangi soliq bekor qilinishi davlatga yiliga taxminan 330 million kron (44 million yevro) zarar keltirishi mumkin, ammo hukumat bu mablag‘ni mamlakat madaniy kelajagiga sarmoya sifatida ko‘rmoqda. Soliqning bekor qilinishi kitob narxini pasaytiradi va aholi, ayniqsa, o‘smirlar orasida kitobxonlikni oshirishga yordam beradi.
Bu qaror Iqtisodiy hamkorlik va taraqqiyot tashkiloti (OECD) e’lon qilgan xavotirli statistika so‘ng qabul qilindi. OECD ma’lumotlariga ko‘ra, Daniyada 15 yoshli o‘smirlarning 24 foizi oddiy matnni tushuna olmaydi. Bu o‘n yil avvalgidan 4 foizga ko‘pdir.
Ekspertlar ta’kidlashicha, kitob solig‘ini bekor qilish mamlakatda bilim va madaniy rivojlanishni oshirishda muhim qadam hisoblanadi. Bu tashabbus kelgusi avlod kitobxonligini rag‘batlantirishi kutilmoqda.
