“Ko‘proq maosh olmoqchi bo‘lsangiz, o‘qishingiz, mutaxassis bo‘lishingiz kerak” — Sirdaryo viloyati hokimi
Erkinjon Turdimov viloyatda ishchi kuchi yetarli bo‘lishiga qaramay, aholining ko‘pchiligi mavjud imkoniyatlardan foydalanmayotganini keskin tanqid qildi.
22-avgust kuni deputatlar bilan o‘tkazilgan yig‘ilishda Erkinjon Turdimovning aytishicha, Sirdaryoda boshqa hududlarga qaraganda ko‘proq ish o‘rinlari mavjud. Ammo mahalla yettiliklari bu borada aholiga yetarlicha ma’lumot bermayotgani sababli, qo‘shni viloyatlardan kelgan ishchilar bo‘sh ish joylarini egallab bormoqda.
Hokimning ta’kidlashicha, ba’zi fuqarolar “uch million so‘mga ishlamaymiz” deya ish takliflaridan bosh tortmoqda.
“Saviyangiz uch millionlik bo‘lsa, boshqa pul bera olmaymiz. Ko‘proq olmoqchi bo‘lsangiz, o‘qishingiz, mutaxassis bo‘lishingiz kerak”, — dedi Turdimov.
U, shuningdek, faqat diplomga tayanib, lekin bilimga ega bo‘lmaganlarni tanqid qilib, bozor sharoitida haqiqiy malakaga ega bo‘lgan kadrlar ko‘proq maosh olayotganini qo‘shimcha qildi.
Turdimovning so‘zlariga ko‘ra, viloyatda ko‘plab murojaatlar tushmoqda, ammo joylarga chiqib o‘rganilganda, murojaat qiluvchilarning katta qismi “boqimanda kayfiyatida” ekani ma’lum bo‘lmoqda.
“Kambag‘alda imkoniyat bo‘lmaydi, ishlay olmaydi — unga yordam qo‘lini cho‘zishimiz kerak. Lekin qo‘lidan ish kelib, ishlamaydigan odam — bu boqimanda. Uni boqimandalikdan chiqarishimiz kerak”, — dedi u.
Hokim, shuningdek, mahallalarda faol targ‘ibot-tashviqot ishlarini olib borib, ishchi kuchini safarbar qilish zarurligini ta’kidladi.
