Rossiyadan 8 nafar o‘zbekistonliklar vatanga qaytarildi
Qaytarilgan fuqarolar jamiyatga samarali moslashishlari uchun ularga davlat tomonidan imtiyozli kreditlar ajratilmoqda.
Rossiyaning Novosibirsk shahrida og‘ir hayotiy sharoitda qolib ketgan 8 nafar o‘zbekistonlik vatanga qaytarildi. Bu insonparvarlik aksiyasi 30-iyuldan 30-avgustgacha davom etayotgan “Vatanga qaytarish” dasturi doirasida amalga oshirildi.
O‘zbekistonning Novosibirsk shahridagi Bosh konsulxonasi va Migratsiya agentligi vakolatxonasi ko‘magida vatandoshlar uchun aviachiptalar xarid qilinib, ular 20-avgust kuni Uzbekistan Airwaysning Novosibirsk–Toshkent reysi orqali yurtiga olib kelindi.
Dasturning asosiy maqsadi chet davlatlarda og‘ir sharoitga tushib qolgan o‘zbekistonliklarni vatanga qaytarishdir. Rejaga ko‘ra, dastlab Turkiya, Rossiya, Qozog‘iston, BAA, Saudiya Arabistoni, Hindiston, AQSH va Koreyadagi deportatsiya markazlarida bo‘lgan ayollar va bolalar qaytariladi.
Qaytarilgan fuqarolarni jamiyatga samarali moslashtirish uchun davlat tomonidan imtiyozli kreditlar, subsidiyalar va o‘zini o‘zi band qilish dasturlari orqali qo‘llab-quvvatlash choralari ko‘rilmoqda. Transport xarajatlari esa Migratsiya jamg‘armasi mablag‘lari hisobidan qoplanadi.
