Turkmaniston san’atkorlariga Mustaqillik bayramigacha ozish buyurildi
Tashqi ko‘rinishga befarq qaragan san’atkorlarning sahnaga chiqishi cheklanishi mumkinligi aytildi.
Turkmaniston madaniyat sohasida faoliyat yuritayotgan san’atkor va ijodkorlarga 27-sentyabr — mamlakat Mustaqillik kuni bayramiga tayyorgarlik jarayonida tashqi ko‘rinishga alohida e’tibor qaratish topshirig‘i berildi.
Xususan, rasmiy axborotlarga ko‘ra, ijodkorlardan sog‘lom turmush tarziga amal qilish, ortiqcha vazndan xoli bo‘lish hamda sahnada estetik qiyofani ta’minlash talab qilinmoqda. Madaniyat muassasalari xodimlariga ushbu masalaga befarq qarash qat’iyan man etilib, belgilangan talablarga amal qilmaganlar bayram tadbirlarida ishtirok eta olmasligi mumkinligi ta’kidlangan.
Turkmaniston hukumati Mustaqillik bayramini mamlakatdagi eng muhim siyosiy-madaniy voqealardan biri sifatida ko‘rib, uni yuksak darajada tashkil etishga intilmoqda. Shu maqsadda so‘nggi yillarda san’atkorlar chiqishlari, madaniy dasturlar hamda umumiy tashkiliy jarayonlar uchun qat’iy mezonlar belgilab kelinmoqda.
