Namanganda 6 yil oldin uyi buzilgan fuqaro kompensatsiya oldi
Hokim qarori bilan buzilgan uy uchun berilmagan tovon puli sud orqali hal qilindi.
Namangan viloyati adliya boshqarmasi ma’lum qilishicha, 2017-yilda namanganlik fuqarolardan birining uyi davlat ehtiyojlari uchun buzib tashlangan, biroq egasiga tegishli kompensatsiya o‘z vaqtida to‘lanmagan.
Huquqshunoslar murojaatni o‘rganar ekan, mazkur uy Namangan shahar hokimining 2017-yil 21-avgustdagi qarori asosida buzilganini aniqladi. Shu bilan birga, uy-joyni buzish ishlari davlat manfaatlari uchun amalga oshirilgan bo‘lsa-da, tovon puli belgilangan tartibda berilmagani ma’lum bo‘ldi.
Fuqaroga yetkazilgan moddiy zararni qoplash maqsadida adliya organlari yuridik yordam ko‘rsatib, Namangan tumanlararo sudiga da’vo arizasi kiritdi. Sud qarori bilan fuqaro foydasiga 200 million so‘m miqdorida kompensatsiya undirildi.
Mazkur holat adliya organlari tomonidan fuqarolarning mulkiy huquqlari himoya qilinayotganini yana bir bor ko‘rsatib bermoqda.
