Samarqandda 44 gektar maydonda Imom Buxoriy majmuasi bunyod etilmoqda

O‘zbekiston Respublikasi Prezidenti Shavkat Mirziyoyev 25-avgust kuni Samarqand viloyatiga tashrif buyurdi. An’anaga ko‘ra, avvalo Imom Buxoriy maqbarasi ziyorat qilinib, Qur’on tilovat qilindi va duolar o‘qildi.

 

Davlatimiz rahbari ziyoratgoh hududida olib borilayotgan keng ko‘lamli qurilish va obodonlashtirish ishlarini ko‘zdan kechirdi. Buyuk muhaddis bobomizga butun islom olamida bo‘lgan yuksak ehtiromni inobatga olib, bu yerda ziyoratchilar uchun keng imkoniyatlar yaratishga qaratilgan ulkan majmua barpo etilmoqda.

 

Majmua umumiy 44 gektar maydonda bunyod etilib, muqaddas maqbara, 10 ming namozxonga mo‘ljallangan masjid, ma’muriy bino va 75 metr balandlikdagi minora inshootlari qad rostladi. Hozirda pardozlash ishlari olib borilmoqda. Ayvon va peshtoqlarga “Sahihi Buxoriy”dan hadislar naqsh etilmoqda.

 

Prezidentimiz ushbu maskan nafaqat ziyoratgoh, balki ilm-ma’rifat, tarbiya va ibrat o‘chog‘i bo‘lishi zarurligini ta’kidladi. Imom Buxoriyning ilmiy merosi yoshlar uchun buyuk namuna ekanligi alohida qayd etildi. Shu maqsadda yangi majmuada zamonaviy muzey tashkil qilinmoqda. Unda Imom Buxoriy hayoti, hadis ilmidagi ulkan merosi, shuningdek Qur’onda zikr etilgan payg‘ambarlar tarixi, Muhammad (s.a.v.) shajarasi va muqaddas Makka hamda Madina hayotiga oid ma’lumotlar aks etadi.

 

Ziyoratgoh atrofida mehmonxona va boshqa xizmat ko‘rsatish maskanlari ham qurilmoqda. Prezidentimiz ishlarni sifatli yakunlash, tashrif buyuruvchilar uchun yanada qulayliklar yaratish va majmua atrofida ko‘kalamzorlashtirish ishlarini kengaytirish yuzasidan topshiriqlar berdi.