Aliyev Donald Trampning sovg‘asi uchun minnatdorlik bildirdi
Tramp tarixiy fotosuratlarni imzo va iliq so‘zlar bilan taqdim etgan.
Ozarbayjon Respublikasi Prezidenti Ilhom Aliyev AQSh prezidenti Donald Trampdan shaxsiy sovg‘a qabul qilib olgani haqida ma’lum qildi. Bu haqda davlat rahbari o‘zining ijtimoiy tarmoqdagi sahifasida xabar berdi.
Aliyevning ta’kidlashicha, Tramp unga tarixiy fotosuratlarni shaxsiy imzosi hamda iliq so‘zlari bilan taqdim etgan. Ozarbayjon rahbari ushbu sovg‘ani yuksak qadrlab, Trampga minnatdorlik izhor etdi.
“Prezident Donald Trampga o‘zining shaxsiy imzosi bilan menga sovg‘a qilgan tarixiy suratlari va ularga yozilgan samimiy so‘zlari uchun minnatdorchilik bildiraman. Shuningdek, Ozarbayjon va Armaniston o‘rtasidagi munosabatlarni normallashtirish hamda Janubiy Kavkaz va butun dunyoda tinchlikni ta’minlash kun tartibini qat’iy qo‘llab-quvvatlagani uchun chuqur minnatdorlik bildiraman”, — dedi Aliyev.
Ma’lumot uchun, Donald Tramp Ilhom Aliyevga yuborgan suratlaridan biriga shaxsiy yozuv ham qoldirgan. Unda shunday deyilgan: “Sen buyuk yo‘lboshchisan”.
Ozarbayjon Prezidenti bu sovg‘ani ikki davlat o‘rtasidagi do‘stona aloqalar ramzi sifatida baholab, Trampga samimiy minnatdorlik izhor etdi.
