Mo‘ynoqdagi gaz otilib chiqqan quduq bir oydan so‘ng jilovlandi
Quduq turli baxtsiz hodisalar va talafotlarsiz jilovlangan.
26-iyul kuni Qoraqalpog‘iston Respublikasi Mo‘ynoq maydonidagi “O‘zbekneftgaz” AJga qarashli yangi, loyihaviy chuqurligi 5000 metr bo‘lgan 1-son izlov qudug‘ida to‘satdan gaz otilib chiqqandi.
“O‘zbekneftgaz” AJ holat bo‘yicha qo‘shimcha maʼlumot berib, ayni paytda gaz qudug‘i muvaffaqiyatli jilovlanganini bildirdi.
Qayd etilishicha, sodir bo‘lgan gaz otqinini bartaraf etish uchun “O‘zbekneftgaz” AJ tomonidan kechayu-kunduz ish olib boruvchi tezkor shtab tashkil qilingan.
Maxsus shtab tomonidan gaz otqinini bartaraf etishga qaratilgan tezkor “Yo‘l xaritasi” ishlab chiqilgan va ishlar bosqichma-bosqich hamkor tashkilotlar ko‘magida amalga oshirilgan.
Bugungi kun holatiga ko‘ra, “Yo‘l xaritasi”dagi barcha ishlar muvaffaqiyatli bajarilib, quduqni boshqarish imkoni yaratilgan. Quduq turli baxtsiz hodisalar va talafotlarsiz jilovlangan.
