Alisher Usmonov Yevropa Ittifoqi Kengashini sudga berdi
Da’voda YeI sanksiyalarni OAVdagi maqolalarga asoslab, tadbirkorning sha’ni va obro‘siga zarar yetkazgani aytilmoqda.
Taniqli tadbirkor Alisher Usmonovning huquqiy himoyasi Yevropa Ittifoqi (YeI) Kengashiga qarshi sudga da’vo arizasi kiritdi. Da’vo mazmuniga ko‘ra, YeI tomonidan 2022-yilda tadbirkorga nisbatan qo‘llangan sanksiyalar ommaviy axborot vositalaridagi maqolalarga asoslangan bo‘lib, bu uning sha’ni va obro‘siga zarar yetkazgan.
Euronews ma’lumotiga ko‘ra, Usmonov manfaatlarini himoya qilayotgan media huquqshunos Yoaxim Shtaynxofel sanksiyalarni “tuhmatga asoslangan” deb baholagan va YeI Kengashini qonuniy asoslarni e’tiborsiz qoldirishda ayblagan.
“Yevropa Ittifoqi Kengashi janob Usmonovning shaxsiy huquqlarini poymol qilmoqda va uning obro‘siga putur yetkazmoqda. Qonun ustuvorligi tamoyili amal qiladigan jamiyatda hech kim qonundan ustun bo‘lishi mumkin emas – na davlat, na xalqaro tashkilot”, – dedi Shtaynxofel RBK nashriga.
Ma’lumot uchun, Alisher Usmonov USM xoldingi asoschisi bo‘lib, uning tarkibiga Metalloinvest, Megafon kabi yirik kompaniyalar kiradi. Forbes ma’lumotlariga ko‘ra, uning boyligi 16,6 mlrd AQSh dollarini tashkil etadi.
Usmonovning advokatlari ta’kidlashicha, YeI Kengashi tadbirkorni sanksiyalar ro‘yxatiga kiritishda Forbes va boshqa nashrlarda chop etilgan materiallardan foydalanib, ularning to‘g‘riligini tekshirmagan. Shu bilan birga, tadbirkor ushbu maqolalarga qarshi bir necha sud jarayonida g‘alaba qozongan. Jumladan, Forbes nashriga qarshi sud qarorida Usmonovning Vladimir Putinning “yaqin odami” yoki “biznes muammolarini hal qiluvchi shaxs” sifatida ko‘rsatilishi yolg‘on deb topilgan va bunday bayonotlarni tarqatish taqiqlangan.
Shtaynxofelning bildirishicha, YeI Kengashi bu kabi maqolalarni so‘zma-so‘z ko‘chirib, tekshirmasdan sanksiya asosiga aylantirgani “qonuniy jihatdan asossiz”.
Tadbirkorning o‘zi ham sanksiyalar uning xalqaro obro‘siga katta zarar yetkazganini bildirgan. U o‘zini “oligarx” deb atash noto‘g‘ri ekanini, chunki u Rossiyadagi xususiylashtirish jarayonida ishtirok etmaganini va davlat yordami olmaganini qayd etgan.
Euronews ta’kidlashicha, mazkur jarayon YeI Kengashiga qarshi tuhmat bo‘yicha ko‘tarilgan birinchi da’vo bo‘lishi mumkin. Dastlab da’vo Gamburg sudida kiritilgan, biroq YeI Kengashining diplomatik daxlsizligi tufayli qabul qilinmagan edi. Endilikda advokat Germaniyaning Karlsrue Federal sudiga murojaat qilgan.
Da’vo mazmuni sanksiyalar ro‘yxatini bekor qilishga emas, balki YeI tomonidan tarqatilgan tuhmatga oid ma’lumotlarni rad etishga qaratilgan.
