“O‘zbekistonga tashrif buyurish haqidagi orzuyim amalga oshganidan chin dildan xursandman”
Yaponiya tashqi ishlar vaziri Ivaya Takeshi O‘zbekistonga keldi.
Bugun Yaponiya tashqi ishlar vaziri Ivaya Takeshi O‘zbekistonga rasmiy tashrif bilan keldi. Uni Toshkent xalqaro aeroportida O‘zbekiston tashqi ishlar vaziri Baxtiyor Saidov kutib oldi. Rasmiy uchrashuv Tashqi ishlar vazirligida bo‘lib o‘tdi.
Tashrif doirasida Ivaya Takeshi Samarqand shahriga ham borib, nafaqat shaharning boy madaniy merosi, balki uning iqtisodiy salohiyati, kelajakdagi hamkorlik imkoniyatlari va yapon kompaniyalari bilan amalga oshirilayotgan qo‘shma loyihalar bilan ham tanishdi. “Yurtingizga tashrif buyurish bo‘yicha bir necha yillik orzuim amalga oshganidan chin dildan xursandman”, dedi vazir.
Muzokaralar davomida tomonlar ikki davlat o‘rtasidagi siyosiy, iqtisodiy, ta’lim, IT, transport, konchilik va “yashil” energetika kabi sohalardagi hamkorlikni yanada kengaytirish masalalarini muhokama qildi. Xususan, kimyo sanoati va energetika bo‘yicha yirik qo‘shma loyihalarni amalga oshirish yuzasidan fikr almashildi.
Uchrashuv yakunida O‘zbekiston va Yaponiya tashqi ishlar vazirliklari o‘rtasida Strategik dialog bo‘yicha qo‘shma kommyunike imzolandi. Ushbu hujjat ikki mamlakat o‘rtasidagi do‘stona va ishonchli munosabatlarni yangi bosqichga olib chiqishi, siyosatdan tortib iqtisodiyot va xalqaro aloqalargacha bo‘lgan barcha yo‘nalishlarda hamkorlikni mustahkamlashi kutilmoqda.
