Toshkentda qalbaki dori ishlab chiqaruvchi yashirin sex fosh etildi
Bu haqda DXX Zamon.uz'ga xabar qildi.
Davlat xavfsizlik xizmati xodimlari tomonidan Iqtisodiy jinoyatlarga qarshi kurashish departamenti bilan hamkorlikda Toshkent shahrida o‘tkazilgan tezkor tadbirda, biologik faol qo‘shimchalar ishlab chiqarishga ixtisoslashgan MChJga tegishli manzilda tashkil etilgan yashirin tsexda qonunga xilof tarzda qalbaki dori vositalari tayyorlanishi va shahar dorixonalari orqali sotilishi ma’lum bo‘ldi.
Tekshiruv davomida ushbu manzildan jami 11 dona dori ishlab chiqarish stanoklari, 21 dona dori tayyorlashda kerak bo‘ladigan qoliplar hamda umumiy og‘irligi 389 kg bo‘lgan kukun va tabletkalar, “Raikal” nomli pnevmatik qurol va boshqa narsalar ashyoviy dalil sifatida olindi.
Shuningdek, MChJga tegishli ikkinchi manzilda ham yashirin tsex mavjud bo‘lib, undan dori vositalari ishlab chiqarishda foydalaniladigan qolip va uskunalar, bo‘sh dori kapsulalari, qutilari, yo‘riqnomalar, kukun ko‘rinishidagi xom-ashyoar protsessual tartibda rasmiylashtirib olindi.
“Farmatsevtika mahsulotlari xavfsizlik markazi” DM ekspertiza xulosasiga ko‘ra, yashirin tsexda “Ursosan 250 mg”, “Neyromidin 20 mg”, “Fanigan” dori vositalari qalbakilashtirilgan.
Tadbir mantiqiy davom ettirilib, mazkur tsexda ishlab chiqarilayotgan dorilarni sotish bilan shug‘ullanuvchi va “Fanigan” dori vositasini qalbakilashtirish bo‘yicha buyurtma berib, 130 kg ushbu dorining substansiyalarini keltirib bergan shaxsning dorixonasi ham ko‘zdan kechirildi.
Natijada, ushbu dorixonadan “Fanigan”, “Azimak”, “Siprolet” kabi 15 turdagi 1.067 quti qalbaki hamda 14 turdagi 274 quti yaroqlilik muddati o‘tgan dorilar aniqlandi.
Hozirda noqonuniy tsex tashkilotchilarining 3 nafariga nisbatan Jinoyat Kodeksining 186-3-moddasi 2-qismi “b” va “g” bandlari bilan jinoyat ishi qo‘zg‘atilib, tergov harakatlari olib borilmoqda.
