Rossiya YEI delegatsiyasi joylashgan binoga zarba berdi
Antonio Koshta buni “qasddan qilingan” deya baholadi.
Bugun, 28-avgust kuni Rossiya Kiyev shahridagi Yevropa Ittifoqi delegatsiyasi joylashgan binoga zarba berdi. Bu haqda Ukraina tashqi ishlar vaziri Andrey Sibiga xabar berdi.
Ukrainadagi Yevropa Ittifoqi elchisi Katarina Matxernova binoga Rossiya tomonidan kechasi uyushtirilgan dron va ballistik raketa hujumlari oqibatida jiddiy zarar yetganini, biroq xodimlar orasida jabrlanganlar yo‘qligini maʼlum qildi.
Andrey Sibiga Rossiyani diplomatlarni nishonga olganlikda ayblab, buni Vena konvensiyasini bevosita buzish deb baholadi.
Yevropa Ittifoqining tashqi siyosat rahbari Kaya Kallas ushbu hujumni mojaroni ataylab keskinlashtirish va tinchlikka qaratilgan saʼy-harakatlarni masxara qilishga urinish sifatida taʼrifladi. Yevropa Kengashi prezidenti Antonio Kosta esa Kiyevdagi YEI delegatsiyasi binosiga yetkazilgan zararni “qasddan qilingan” deya baholadi.
So‘nggi maʼlumotlarga ko‘ra, Rossiyaning Ukraina bo‘ylab tungi hujumlari oqibatida 15 kishi halok bo‘lgan.
