Toshkent metropolitenida kassirlik lavozimi bekor qilinadi
Ishdan bo‘shatilgan xodimlar boshqa kasblarga o‘qitiladi.
“Toshkent metropoliteni” DUK tomonidan yo‘lovchilarga xizmat ko‘rsatish tizimini modernizatsiya qilish ishlari davom ettirilmoqda. 2025-yil oxiriga qadar barcha bekatlarda chiptalarni naqd yoki elektron shaklda xarid qilish imkonini beruvchi avtomatlashtirilgan terminallar o‘rnatilishi rejalashtirilgan.
Mazkur yangilanish natijasida kassirlik lavozimi bosqichma-bosqich qisqartirilib, keyinchalik butunlay bekor qilinadi. Shu munosabat bilan, metropoliten ma’muriyati o‘z xodimlarini qo‘llab-quvvatlash maqsadida ularni kasbiy qayta tayyorlash dasturlariga jalb etmoqda.
Xodimlarga buxgalteriya hisobi, tikuvchilik, qandolatchilik va boshqa sohalar bo‘yicha malaka oshirish kurslari taklif qilinmoqda. Ushbu o‘quv kurslarining barcha xarajatlari “Toshkent metropoliteni” tomonidan qoplab beriladi.
Metropoliten rahbariyati mazkur islohot nafaqat yo‘lovchilar uchun qo‘shimcha qulayliklar yaratishini, balki xodimlarga yangi kasb egallash orqali kelgusida munosib faoliyat yuritish imkonini berishini ta’kidlab o‘tdi.
