Dam olish kunlari O‘zbekistonda salqin havo kutilmoqda
Harorat kechalari asta-sekin 13-15 darajagacha pasayadi.
Ertadan boshlab respublika hududiga shimoli-g‘arbdan nisbatan salqin havo massalari kirib keladi. Bu haqida O‘zgidromet xabar berdi.
Havo harorati asta-sekin pasayadi va 30 avgustda 31-36 daraja, 31 avgust va 1 sentyabrda 28-33 darajani tashkil etadi.
Kechasi va ertalab salqin havo sezilarli bo‘ladi, 1 sentyabrga kelib, harorat kechasi 13-16 darajagacha pasayadi.
Shu kunlarda respublika bo‘yicha bulutsiz va quruq ob-havo saqlanib turadi.
Respublika bo‘yicha baʼzi joylarda shamol tezligi 13-18 m/s gacha kuchayishi kutilmoqda, 30-31 avgust va 1 sentyabrda ayrim joylarda baʼzida 20-23 m/s gacha kuchayishi, chang-to‘zonlar bilan kuzatilishi mumkin.
Toshkentda havo bulutsiz bo‘ladi. Sharqiy shamol yo‘nalishini o‘zgartirib, shimoli-g‘arbdan 3-8 m/s tezlikda esadi, 30-31 avgustda 10-14 m/s gacha kuchayishi, baʼzi joylarda chang-to‘zonlar bilan kuzatilishi mumkin.
Bugun kunduzi harorat 37-39 daraja, shanba kuni 34-36 daraja, yakshanba va dushanba kunlari 30-32 daraja bo‘ladi. Harorat kechalari asta-sekin 13-15 darajagacha pasayadi.
