Endi o‘zbekistonliklar Iordaniyaga vizasiz bora oladi
Bu bo‘yicha kelishuv 25 sentyabrdan kuchga kiradi.
Joriy yilning 25 sentyabr kunidan O‘zbekiston fuqarolari Iordaniya Hoshimiy Podshohligiga vizasiz kirib, u yerda 30 kungacha bo‘lib turishi mumkin. Bu haqida Tashqi ishlar vazirligi maʼlum qildi.
Avvalroq Samarqandda Shavkat Mirziyoyev va Iordaniya qiroli Abdulla II ibn al-Husayn o‘rtasida muzokaralar bo‘lib o‘tgandi.
Uchrashuv doirasida ikki tomonlama hamkorlikka oid qator hujjatlar, jumladan, vizasiz tartib joriy etish to‘g‘risidagi kelishuv imzolangandi.
Hujjat 25 sentyabrdan kuchga kiradi. Bunga qadar O‘zbekiston fuqarolari Iordaniya vizasini ushbu davlatga borganda olishlari mumkin edi.
Vizasiz tartib joriy qilinishi bilan Iordaniya o‘zbekistonliklar vizasiz kirishi mumkin bo‘lgan mamlakatlar sonida 36-davlat bo‘ladi.
