Metroda kassa xodimlari ommaviy ishdan bo‘shatilyaptimi?

Ijtimoiy tarmoqlarda Toshkent metrosi bekatlarida kassa xodimlari ommaviy ishdan bo‘shatilishi aytilgan xabarlar tarqalgandi. Toshkent metropoliteni bunga rasmiy munosabat bildirdi. 

 

Qayd etilishicha, so‘nggi vaqtlarda yo‘lovchilar tomonidan bir martalik chiptalarga bo‘lgan talab keskin kamayib ketdi. Ayrim bekatlarning bittadan vestibyullaridagi kassalar yopilib, uning o‘rniga avtomatlashtirilgan bankomatlar sinov tariqasida o‘rnatildi. 

 

Shuningdek, yo‘l haqini undirishning shaffofligini va to‘laqonligini taʼminlash maqsadida ATTO kompaniyasi tomonidan jamoat transportlarida hamda Toshkent metropoliteni bekatlarida elektron to‘lov tizimlari joriy etilgan.

 

Bugungi kunda metropolitenning 23 bekatida yo‘l haqini naqd pulda to‘lovni amalga oshirmoqchi bo‘lgan fuqarolarga 24 ta QR-kodli chipta chiqarib beruvchi infokiskalar o‘rnatilgan. Bir marotabalik QR-kodli chiptaning narxi metropoliten kassalarida ham, infokioskalarda ham 3 000 so‘m etib belgilangan bo‘lib, agar yo‘lovchi tomonidan 5 ming, 10 ming yoki undan yuqori bo‘lgan kupyuralar kiritilganda, qolgan mablag‘ fuqaroning mobil raqamining hisob raqamiga qaytim sifatida tashlab beriladi. Joriy yilning yakuniga qadar metropolitenning barcha bekatlariga 200 ta infokiosklar o‘rnatilishi rejalashtirilgan.

 

“Metropolitenda avtomatlashtirilgan tizim o‘rnatilishi sababli qisqarishga tushgan xodimlar uchun belgilangan tartibda to‘rt oylik lavozim ish haqqi miqdorida kompensatsiya va nafaqalar to‘lab beriladi. Bundan tashqari, lavozimi qisqartirilayotgan xodimlarni kelgusida ish bilan taʼminlash maqsadida buxgalteriya, tikuvchilik, qandolatchilik kabi yo‘nalishlardagi kurslarida o‘qishi uchun xarajatlar “Toshkent metropoliteni” DUK tomonidan to‘lab beriladi”, deyiladi rasmiy munosabatda.