NNTlar faoliyatiga noqonuniy aralashganlik uchun javobgarlik kiritilmoqda
Shuningdek, NNTlarining faoliyatni amalga oshirish tartibini buzganligi uchun javobgarligi qayta ko‘rib chiqilmoqda.
Joriy yilning 21 avgust kuni O‘zbekiston Respublikasi Prezidenti Sh.M.Mirziyoyev tomonidan “Ayrim qonun hujjatlariga qo‘shimcha va o‘zgartirishlar kiritish to‘g‘risida”gi Qonun imzolandi.
Maqsad - ijtimoiy-iqtisodiy sohada jamoatchilik nazoratini kuchaytirish, nodavlat notijorat tashkilotlari faoliyatining erkinligi kafolatlarini mustahkamlash hamda homiylik xayriyalarini yig‘ish tartibini aniq belgilash.
O‘zbekiston Respublikasining Maʼmuriy javobgarlik to‘g‘risidagi kodeksida NNTlarining faoliyatiga qonunga xilof ravishda aralashganlik, jamoatchilik nazoratini amalga oshirish natijalari bo‘yicha tayyorlangan yakuniy hujjatni ko‘rib chiqmaganlik uchun javobgarlik belgilanmoqda, shuningdek, NNTlarining faoliyatni amalga oshirish tartibini buzganligi uchun javobgarligi qayta ko‘rib chiqilmoqda.
Jumladan:
– qonunchiligimizda birinchi marotaba NNTning faoliyatiga qonunga xilof ravishda aralashganlik uchun (1978-modda) 2,8 mln so‘mdan 6,1 mln so‘mgacha jarima belgilanmoqda.
– jamoatchilik nazoratini amalga oshirish natijalari bo‘yicha tayyorlangan yakuniy hujjatni belgilangan muddatda ko‘rib chiqmaganlik uchun (1987-modda) davlat organlari mansabdor shaxslariga 1,2 mln so‘mdan 2 mln so‘mgacha jarima belgilanmoqda;
– NNT faoliyatini amalga oshirish tartibini buzish bilan bog‘liq ayrim huquqbuzarliklar uchun jarimalar o‘rtacha chorak qismga kamaytirilmoqda.
