Qamchiqda dahshatli avariya: uch kishi halok bo‘ldi
Yana bir yo‘lovchi tan jarohatlari bilan shifoxonaga yotqizilgan.
Kecha, 28 avgust kuni Qamchiq dovonida odam o‘limi bilan bog‘liq ikkita yo‘l-transport hodisasi yuz berdi. Bu haqida Namangan viloyati IIB YHXB xabar qildi.
Qayd etilishicha, Vodiy-Toshkent yo‘nalishida Lacetti avtomashinasini boshqarib ketayotgan haydovchi harakat xavfsizligini taʼminlay olmasdan o‘zi bilan bir yo‘nalishda harakatlanib kelayotgan yuk mashinasiga urilib, YTH sodir etgan.
Natijada Lacetti yo‘lovchisi og‘ir tan jarohati bilan vafot etgan. 2-yo‘lovchi esa shifoxonaga yotqizilgan.
Mazkur hududda soat 08:39 larda ham Cobalt boshqarib ketayotgan haydovchi harakat xavfsizligini taʼminlay olmay, boshqaruvni yo‘qotib o‘zi bilan bir yo‘nalishda yo‘lning o‘ng tomonida harakatlanib ketayotgan yuk mashinasining orqa qismiga va yo‘lning o‘ng tomonida harakatlanib ketayotgan yana bir yuk mashinasiga borib urilgan.
Hodisa oqibatida Cobaltda bo‘lgan ikki yo‘lovchi og‘ir tan jarohatlari bilan vafot etgan.
Har ikki holat yuzasidan Pop tuman IIB TB tomonidan JKning 266-moddasi 2-qismi bilan jinoyat ishi qo‘zg‘atildi.
